వాల్మీకి తెలుగు రామాయణం

పారిభాషికపదమలు : కల్ప సూత్రములు -ఒక లఘు పరిచయము

• Print
• Email
• Share on FaceBook
• Share on Twitter

కల్ప సూత్రములు -ఒక లఘు పరిచయము

ఈ వ్యాసములో కల్ప సూత్రములు ఏవి అనునది చర్చించబడలేదు. అసలు కల్ప సూత్రముల గురించి తెలియని వారికి, అవంటే ఏమిటి, వాటి పేర్లు, వాటిలోని భేదములు, వాటి ఉపయోగము వంటి విషయములు మాత్రము వివరించుట జరిగినది.

కల్పసూత్రములు అంటే ఏమిటో చాలా మందికి తెలియకపోయినా, వాటిని దాదాపు అందరు హిందువులూ నిత్యజీవితములో ఆచరించి, ఉపయోగిస్తుంటారు.

వేదములలో ఉపయోగింపబడిన భాష వలన, అందులో వివరింపబడిన సంక్లిష్ట మైన అనుష్ఠాన పద్దతుల వలన, వేదములను చదివి అర్థము చేసుకొనుట దుస్సాధ్యము. దాదాపు అసంభవము.

కానీ వేదముల ఉనికి మానవుల అభ్యుదయము కోసము మాత్రమే. అటువంటప్పుడు అర్థము కాకపోవుట వలన ప్రయోజనము లేదు. వేదములు ఆ విధముగా సామాన్యులకు అందుబాటులో ఉండకపోవుటకు కారణము, కేవలము వాటి పరిరక్షణార్థము మాత్రమే.

వేదముల అంగములు అనగా వేదాంగములు అధ్యయనం చేయుట, వేదములను అర్థము చేసుకొనుటకు సరైన మార్గము. దాదాపు వేదములు ఆవిర్భవించిన కాలము నుండే ఈ అంగములు కూడా ఉన్నాయి. వీటివల్ల, వేదములయందున్న ధర్మ సూక్ష్మములను, వాటి రహస్యములను తెలుసుకొనుట, వాటిలోని విషయములను అర్థము చేసుకొనుట, ఆచరించుట సులభము అవుతుంది. ఆ వేదాంగములు ఆరు. అవి,

1. శిక్ష,
2 ఛందస్సు,
3 వ్యాకరణము,
4 నిరుక్తము,
5 జ్యౌతిష్యము [ జ్యోతిష్యము కాదు ] ... జ్యౌతిష్యము అంటే ఖగోళ శాస్త్రానికి సంబంధించినది.
6 కల్పము

ఈ ఆరింటినీ, వాటి విషయ ఆధిక్యత వలన, శాస్త్రములు అని కూడా అంటారు. ఆరవదైన కల్పము మన అనుష్ఠాన, ఆచారములను వివరించును. కల్పము అంటే ప్రయోగము అని కూజా అనవచ్చు. ఇందు నాలుగు శాఖలున్నవి. శ్రౌత, గృహ్య, ధర్మ, మరియు శుల్బ సూత్రములు. ఇవన్నీ కలిపితే కల్పసూత్రములు అవుతాయి. ఇప్పుడు ఈ నాలుగింటి గురించీ క్లుప్తముగా తెలుసుకుందాము..

శ్రౌత సూత్రములు
శ్రౌత సూత్రములు ముఖ్యముగా వైదిక యజ్ఞ యాగాదుల గురించీ, వాటిని ఆచరించవలసిన పద్దతులు, వివరాలను వర్ణిస్తాయి. కొన్ని శ్రౌత సూత్రములను కిందివిధముగా వర్గీకరించవచ్చు.
యజమానుడు, ఋత్త్విక్కులు, వారి ధర్మములు, వారి కార్య కలాపములు
అగ్న్యాధేయము -- అనగా, అరణులను రాపిడి చేసి అగ్నిని పుట్టించుట
దర్శపూర్ణమాస యాగము, సోమయాగము, చాతుర్మాస్య బలులు, సత్రయాగములు వంటివాటి వర్ణన, వివరణ.
అగ్నిచయనము -- అనగా, ఇటుకలను యాగవేదికలు చేయుటలో ఉపయోగించు పద్దతులు, విధములను వర్ణించుట.
వేదములోని అన్ని శాఖలలోను వాటికి సంబంధించిన శ్రౌత సూత్రములు ఉన్నాయి. వాటిని కింది విధములైన పేర్లతో తెలుసుకొనవచ్చును.

ఋగ్వేదము: ఆశ్వలాయన శ్రౌత సూత్రములు, సాంఖ్యాయన శ్రౌత సూత్రములు.
శుక్ల యజుర్వేదము: కాత్యాయన శ్రౌత సూత్రములు.
కృష్ణ యజుర్వేదము: ఆపస్తంబ శ్రౌత సూత్రములు, బౌధాయన శ్రౌత సూత్రములు, భారద్వాజ శ్రౌత సూత్రములు, మానవ శ్రౌత సూత్రములు, మరియూ వైఖానస శ్రౌత సూత్రములు.
సామవేదము: ఆర్షేయ కల్పసూత్రములు [ లేక ] మశక కల్పసూత్రములలోని శ్రౌత సూత్రములు, ద్రాహ్యయణ శ్రౌత సూత్రములు, జైమినీయ శ్రౌత సూత్రములు, లాట్యాయన శ్రౌత సూత్రములు.
అథర్వ వేదము: వైతాన శ్రౌత సూత్రములు.
ఈ శ్రౌత సూత్రములు లేకున్నచో, అనేకములైన వైదిక యజ్ఞాలు చేయుట అసాధ్యము.

గృహ్య సూత్రములు
మనము గృహములలో ఆచరించతగిన, ఆచరించవలసిన సాంప్రదాయాలను, తంతులను, అనగా షోడశసంస్కారములు, పాకయజ్ఞములు వివరించునవి గృహ్య సూత్రాలు. నాలుగు వేదశాఖలకు చెందిన గృహ్య సూత్రాల పేర్లు (ఇప్పటికిని వినబడుచు ఉన్నవి)
ఋగ్వేదము : ఆశ్వలాయన గృహ్య సూత్రములు, సాంఖ్యాయన గృహ్య సూత్రములు
శుక్ల యజుర్వేదము : పారస్కర గృహ్య సూత్రములు
కృష్ణ యజుర్వేదము : ఆపస్తంబ గృహ్య సూత్రములు, బౌధాయన గృహ్య సూత్రములు,భారద్వాజ గృహ్య సూత్రములు.
సామవేదము : గోభిల గృహ్య సూత్రములు, జైమినీయ గృహ్య సూత్రములు, ఖాదిర గృహ్య సూత్రములు.
అథర్వ వేదము : కౌశిక గృహ్య సూత్రములు.

ధర్మ సూత్రములు
ధర్మ సూత్రములనే, " సామయాచారిక సూత్రములు " అని కూడా అంటారు. ఈ ధర్మసూత్రములు ముఖ్యముగా ఆచారములు, వ్యవహారములు, మరియు వర్ణాశ్రమ ధర్మములను గురించి వివరిస్తాయి. ఇక్కడ ఒక ముఖ్య మైన విషయమును గుర్తుంచుకొనుట అవసరము. ధర్మ సూత్రములు, గృహ్య సూత్రములు ఇంచుమించు కలగలసి ఉండి, రెంటికీ దగ్గర సంబంధము ఉండును. అందులోని సూత్రములు ఇందులోను, ఇందులోనివి అందులోను ఉండే అవకాశము ఉంది. అయినా, వాటి ముఖ్య భేదము ఏమనగా, గృహ్య సూత్రములు పాకయజ్ఞములకు, సంస్కారములకూ పరిమితము కాగా, ధర్మ సూత్రములు వర్ణాశ్రమ ధర్మాలను ఎత్తి చూపుతాయి. ధర్మసూత్రములు కింది విధములుగా ఉంటాయి. ఋగ్వేదము : వాశిష్ట ధర్మ సూత్రములు.

శుక్ల యజుర్వేదము : శంఖ లిఖిత ధర్మ సూత్రములు.
కృష్ణ యజుర్వేదము : ఆపస్తంబ ధర్మ సూత్రములు, బౌధాయన ధర్మ సూత్రములు, హారీత ధర్మ సూత్రములు,
హిరణ్యకేశి ధర్మ సూత్రములు, వైఖానస ధర్మ సూత్రములు, విష్ణు ధర్మ సూత్రములు.
సామవేదము : గౌతమ ధర్మ సూత్రములు
అథర్వ వేదమునకు ధర్మ సూత్రములు ఉన్నవీ లేనిదీ తెలియదు. ఒకవేళ ఉంటే , వాటిపేర్లు తెలియవు.
శుల్బ సూత్రములు
శుల్బము అనగా, కొలతలు కొలుచుటకు ఉపయోగించు దారము , లేక తాడు. యజ్ఞ వేదికలు, యాగవాటికలు, యాగ శాలలు నిర్మించుటకు పాటించవలసిన కొలతలను ఈ శుల్బ సూత్రములు వివరిస్తాయి. శుల్బ సూత్రములను అధ్యయనము చేసి పరిశీలిస్తే , వేదకాలములోనే రేఖా గణితము యొక్క అద్భుత జ్ఞానము మన ప్రాచీన ఋషులు అందించినది చూసి ఆశ్చర్యపోక తప్పదు. ఆయా కొలతలు, ఆకారములు చూస్తే అబ్బురముతో నిశ్చేష్టులము కాక తప్పదు. ప్రస్తుతము మనకు ఏడు శుల్బ సూత్రములు లభ్యముగా ఉన్నవి. ఈ కల్ప సూత్రములన్నీ కూడా , వేదాంతములైన ఉపనిషత్కాలానికి తరువాత ఉనికిలోనికి వచ్చినవి. అవి కూడా శ్రౌత సూత్రాలకు చాలా సన్నిహితముగా సంబంధించి ఉన్నాయి. అవి -

ఆపస్తంబ శుల్బ సూత్రములు,
బౌధాయన శుల్బ సూత్రములు ,
కాత్యాయన శుల్బ సూత్రములు ,
మైత్రాయణ శుల్బ సూత్రములు ,
మానవ శుల్బ సూత్రములు ,
వాధూల శుల్బ సూత్రములు ,
వరాహ శుల్బ సూత్రములు

గమనిక - బ్రహ్మ సూత్రములు:- సూత్రముల గురించి విన్నపుడు, చదివినపుడు, సహజముగా గుర్తొచ్చేది " బ్రహ్మ సూత్రములు" అనే పేరు. కల్ప సూత్రములకు, బ్రహ్మ సూత్రములకు ఎట్టి సంబంధమూ లేదు. వీటిలో కల్ప సూత్రములు ప్రాచీనమైనవి, బ్రహ్మ సూత్రములు అర్వాచీనమైనవి.

|| శుభం భూయాత్ ||

సౌజన్యము –
విభాత వీచికలు: కల్ప సూత్రములు -ఒక లఘు పరిచయము (vibhaataveechikalu.blogspot.com)